Ick brued[er] Henric[us] van Barsdo[n]ck, com[m]enduyr des Heilige[n] Godshuys va[n] Su[n]t Johan byn[n]en Nijm[m]ege[n], belije en[de] beken[n]e myt dessen brieff voir mij ende
mine naecomeli[n]ge dat ic ter ere[n] Gods en[de] om bede wille suster Mechtels vand[er] Molen ontfange[n] heb in onser ordens susterscap die selve voirbenoe[m]de
suster Mechtelt mit al hare suste[re]n, nu ter tijt myt haer i[n] hare[n] huse geheiten Bethleem wone[n]de of naemaels sulle[n] come[n] te wone[n] tot ene[n] sekeren
getale[n] toe als tot seve[n] of achte toe, deelachtich te wese[n] ten ewige[n] dagen toe alle der gued[er] w[er]ke[n], het si i[n] vaste[n], i[n] wake[n], misse[n] of vigilie[n] en[de] oec in
martelije[n] of bloetstorti[n]ge tege[n]s die Torke[n] en[de] ongelovige[n], oec mede te gebruke[n] en[de] deelachtich te wese[n] al alsulker g[ra]cie[n], genade[n] en[de] aflaet als ons
en[de] onser gansser orde[n] van de[n] stoel va[n] Rome[n] gegeve[n] en[de] v[er]leent is. En[de] oec mede ind[er] tijt des gemeyne[n] bans misse i[n] onser kerke[n] te hore[n] en[de] off
des noot dede haer sac[ra]mente[n] i[n] leve[n] en[de] i[n] dode va[n] ons orde[n]spriest[er] te moge[n] t'ontfange[n] en[de] daer tege[n] te moge[n] biechte[n] en[de] absolvere[n] te laten
mit al alsulker voirw[aar]de[n] dat si alle dage[n] myt yn[n]ichh[ei]t haers h[er]te[n] sulle[n] spreke[n] vijf P[ate]r N[oste]r ende vijf Ave Maria voir alle brued[er]s en[de] suste[re]n d[er] orde[n] voirs[eid]
en[de] dat si alle jair i[n] gede[n]cke[n]isse der gr[a]cien en[de] privilegie[n] voirs[eid] eens op Su[n]t Ja[n]sdach to Midsomer sulle[n] haer sust[er]scap beken[n]e[n] i[n] ons[er] kerk[en]
mit ene[n] pen[n]i[n]g of mit eenre waskerze[n] nae hare[n] guetdu[n]cke[n], wa[n]t o[n]se heilige vad[er] die paews dat also i[n] sinen bulle[n] bevole[n] heeft. Oec
mede sulle[n] sij onser orde[n] en[de] onser orden brued[er]s altijt trow ende haut wese[n], voir oge[n] en[de] achter rug haer guet te vorde[re]n ende haer quaet te
scuten also s'veel als si con[n]e[n] myt raed en[de] myt daed bute[n] hare[n] cost en[de] scade. In gedencke[n]isse en[de] tuych der voirscreve[n] susterscap
so heb ic brud[er] Henrick, com[m]enduyr voirs[eid], mine[n] segel aen desse[n] brief gehange[n] in de[n] jair ons He[re]n MCCCC ende LXVI op onse Liever
Vrouwe[n]avont Assu[m]pcio.
